zindagi be-sar-o-saman hai qissa kya hai

zindagī be-sar-o-sāmān hai qissa kyā hai

jis ko dekho vo pareshān hai qissa kyā hai

zulf aariz pe pareshān hai qissa kyā hai

sāya-e-kufr meñ īmān hai qissa kyā hai

aaj ke daur meñ bas chāk-garebāñ honā

tere dīvānoñ kī pahchān hai qissa kyā hai

yā tire husn kī tanvīr se raushan hai jahāñ

yā mire ishq kā irfān hai qissa kyā hai

zohd shiblī-o-ġhazālī kā hayā hāfiz kī

haath meñ 'mīr' kā dīvān hai qissa kyā hai

azmat-bād-e-bahārī mujhe taslīm magar

phuul sharminda-e-ehsān hai qissa kyā hai

apne anjām se kyoñ aaj kā insāñ 'anvar'

jānte būjhte anjān hai qissa kyā hai

zindagi be-sar-o-saman hai qissa kya hai

jis ko dekho wo pareshan hai qissa kya hai

zulf aariz pe pareshan hai qissa kya hai

saya-e-kufr mein iman hai qissa kya hai

aaj ke daur mein bas chaak-gareban hona

tere diwanon ki pahchan hai qissa kya hai

ya tere husn ki tanwir se raushan hai jahan

ya mere ishq ka irfan hai qissa kya hai

zohd shibli-o-ghazali ka haya hafiz ki

hath mein 'mir' ka diwan hai qissa kya hai

azmat-baad-e-bahaari mujhe taslim magar

phul sharminda-e-ehsan hai qissa kya hai

apne anjam se kyon aaj ka insan 'anwar'

jaante bujhte anjaan hai qissa kya hai