zindagi-bhar ek hi kar-e-hunar karte rahe

zindagī-bhar ek hī kār-e-hunar karte rahe

ik gharauñdā ret kā thā jis ko ghar karte rahe

ham ko bhī ma.alūm thā anjām kyā hogā magar

shahr-e-kūfa kī taraf ham bhī safar karte rahe

uḌ ga.e saare parinde mausamoñ kī chaah meñ

intizār un kā magar būḌhe shajar karte rahe

yuuñ to ham bhī kaun sā zinda rahe is shahr meñ

zinda hone kī adākārī magar karte rahe

aañkh rah taktī rahī dil us ko samjhātā rahā

apnā apnā kaam donoñ umr-bhar karte rahe

ik nahīñ kā ḳhauf thā so ham ne pūchhā hī nahīñ

yaad kyā ham ko bhī vo dīvār-o-dar karte rahe

zindagi-bhar ek hi kar-e-hunar karte rahe

ek gharaunda ret ka tha jis ko ghar karte rahe

hum ko bhi malum tha anjam kya hoga magar

shahr-e-kufa ki taraf hum bhi safar karte rahe

uD gae sare parinde mausamon ki chah mein

intizar un ka magar buDhe shajar karte rahe

yun to hum bhi kaun sa zinda rahe is shahr mein

zinda hone ki adakari magar karte rahe

aankh rah takti rahi dil us ko samjhata raha

apna apna kaam donon umr-bhar karte rahe

ek nahin ka KHauf tha so hum ne puchha hi nahin

yaad kya hum ko bhi wo diwar-o-dar karte rahe