زندگی بھر زندگی کی خاک میں چھانا کیا

زندگی بھر زندگی کی خاک میں چھانا کیا

غیر کو اپنا کیا اپنے کو بیگانا کیا

حسن کے انکار میں اقرار کا پہلو بھی ہے

ہم نے اس کو ہاں ہی سمجھا اس نے جب نا نا کیا

میں نمازی یا پجاری تو نہیں ہوں ہاں مگر

میرے مالک میں نے تیرا شکر روزانہ کیا

شدت تشنہ لبی لائی ہمیں اس موڑ پر

میکدے میں بارہا ہاتھوں کو پیمانا کیا

جب سے اہل ذوق کی دلچسپیاں کم ہو گئیں

ہم نے ماہانہ نشستوں کو بھی سالانہ کیا

جانے کتنے تاج آ کر میرے قدموں میں گرے

میں نے جینے کا طریقہ جب فقیرانہ کیا

دوسروں کی راہ پر چلنا ہمیں آیا نہیں

کام ہم نے جو کیا راہبؔ جداگانہ کیا