zindagi-bhar zindagi ki KHak main chhana kiya

zindagī-bhar zindagī kī ḳhaak maiñ chhānā kiyā

ġhair ko apnā kiyā apne ko begānā kiyā

husn ke inkār meñ iqrār kā pahlū bhī hai

ham ne us ko haañ hī samjhā us ne jab nā-nā kiyā

maiñ namāzī yā pujārī to nahīñ huuñ haañ magar

mere mālik maiñ ne terā shukr rozāna kiyā

shiddat-e-tishna-labī laa.ī hameñ is moḌ par

mai-kade meñ bārhā hāthoñ ko paimānā kiyā

jab se ahl-e-zauq kī dilchaspiyāñ kam ho ga.iiñ

ham ne māhāna nashistoñ ko bhī sālāna kiyā

jaane kitne taaj aa kar mere qadmoñ meñ gire

maiñ ne jiine kā tarīqa jab faqīrāna kiyā

dūsroñ kī raah par chalnā hameñ aaya nahīñ

kaam ham ne jo kiyā 'rāhib' judāgāna kiyā

zindagi-bhar zindagi ki KHak main chhana kiya

ghair ko apna kiya apne ko begana kiya

husn ke inkar mein iqrar ka pahlu bhi hai

hum ne us ko han hi samjha us ne jab na-na kiya

main namazi ya pujari to nahin hun han magar

mere malik main ne tera shukr rozana kiya

shiddat-e-tishna-labi lai hamein is moD par

mai-kade mein barha hathon ko paimana kiya

jab se ahl-e-zauq ki dilchaspiyan kam ho gain

hum ne mahana nashiston ko bhi salana kiya

jaane kitne taj aa kar mere qadmon mein gire

main ne jine ka tariqa jab faqirana kiya

dusron ki rah par chalna hamein aaya nahin

kaam hum ne jo kiya 'rahib' judagana kiya