zindagi dast-e-tah-e-sang rahi hai barson

zindagī dast-e-tah-e-sañg rahī hai barsoñ

ye zamīñ ham pe bahut tañg rahī hai barsoñ

tum ko paane ke liye tum ko bhulāne ke liye

dil meñ aur aql meñ ik jañg rahī hai barsoñ

apne hoñToñ kī dahaktī huī surḳhī bhar do

dāstāñ ishq kī be-rañg rahī hai barsoñ

dil ne ik chashm-e-zadan meñ hī kiyā hai vo kaam

jis pe duniyā-e-ḳhirad dañg rahī hai barsoñ

kis ko ma.alūm nahīñ vaqt ke dil kī dhaḌkan

merī hamrāz-o-ham-āhañg rahī hai barsoñ

saaf tārīḳh ye kahtī hai ki mansūrī se

muzmahil satvat-e-aurañg rahī hai barsoñ

merī hī ābla-pā.ī kī badaulat 'aḳhtar'

rah-guzar un kī shafaq-rañg rahī hai barsoñ

zindagi dast-e-tah-e-sang rahi hai barson

ye zamin hum pe bahut tang rahi hai barson

tum ko pane ke liye tum ko bhulane ke liye

dil mein aur aql mein ek jang rahi hai barson

apne honTon ki dahakti hui surKHi bhar do

dastan ishq ki be-rang rahi hai barson

dil ne ek chashm-e-zadan mein hi kiya hai wo kaam

jis pe duniya-e-KHirad dang rahi hai barson

kis ko malum nahin waqt ke dil ki dhaDkan

meri hamraaz-o-ham-ahang rahi hai barson

saf tariKH ye kahti hai ki mansuri se

muzmahil satwat-e-aurang rahi hai barson

meri hi aabla-pai ki badaulat 'aKHtar'

rah-guzar un ki shafaq-rang rahi hai barson