زندگی فرط حادثات سے ہے

زندگی فرط حادثات سے ہے

موت آسائش حیات سے ہے

شام‌ ظلمت ہے مفت میں بدنام

آبروئے سحر تو رات سے ہے

بے رخی میں ہے کیف سرشاری

تشنگی لطف التفات سے ہے

ذوق آرائش جمال سے دور

سادگی حسن کی صفات سے ہے

میں نہ ہوتا تو بات ہی کیا تھی

بات لیکن جو کائنات سے ہے

قرب جاناں سے خوف کھاتا ہوں

پیار ترک تعلقات سے ہے

ریت کے ڈھیر پر لکھا ہے نام

یہ عمل جیسے باقیات سے ہے

حادثے آگ بجلیاں آندھی

جو بھی آفت ہے میری ذات سے ہے

کتنے دریا تھے موجزن اس میں

تشنہ لب جو لب فرات سے ہے

نظم و قطعات بھی کلیمؔ ہیں خوب

کیف غزلوں کی واردات سے ہے