zindagi humne tere rang mein Dhaali bhi hai

zindagī ham ne tire rang meñ Dhālī bhī hai

ravish-e-zīst magar apnī nirālī bhī hai

kyā guzartī hai bhalā tā.ir-e-jāñ par ai ishq

shauq-e-parvāz bhī hai be-par-o-bālī bhī hai

ishq kā kaam to denā hai so jaañ dī ai dil

ham ne duniyā se koī chiiz bhalā lī bhī hai

ham akelā tujhe us shahr meñ chhoḌ aa.e haiñ

ham ne ik baat to ai dil tirī Taalī bhī hai

sar meñ saudā bhī nahīñ dil meñ tamannā bhī nahīñ

masnad-e-ishq magar ham ne sañbhālī bhī hai

zindagi hum ne tere rang mein Dhaali bhi hai

rawish-e-zist magar apni nirali bhi hai

kya guzarti hai bhala tair-e-jaan par ai ishq

shauq-e-parwaz bhi hai be-par-o-baali bhi hai

ishq ka kaam to dena hai so jaan di ai dil

hum ne duniya se koi chiz bhala li bhi hai

hum akela tujhe us shahr mein chhoD aae hain

hum ne ek baat to ai dil teri Tali bhi hai

sar mein sauda bhi nahin dil mein tamanna bhi nahin

masnad-e-ishq magar hum ne sanbhaali bhi hai