zindagi humne teri jhuTi numaish ke liye

zindagī ham ne tirī jhūTī numā.ish ke liye

kitne sangīn haqā.eq ke gale ghoñT diye

ham ne kuchh shoḳh ujāloñ kī havā meñ aakar

apnī sanjīda-nigāhī ke bujhā Daale diye

mere armānoñ kī shabnam tire ruḳhsār kī dhuup

aur kyā chāhiye shādābi-e-gulshan ke liye

kuchh hamīñ ḳhvāb ke maare the na chauñke varna

terī aamad ke saveroñ ne to paiġhām diye

vaqt-e-be-rahm kā andāz-e-karam to dekho

jin ko ā.īne diye dard ke chehre na diye

tere dāman meñ to hai sub.h-e-daraḳhshāñ kī bahār

ai shab-e-tār magar zahr tirā kaun piye

zindagī raqs par āmāda huī hai jab bhī

vaqt ne halqa-e-zanjīr ke bal toḌ diye

jaane vaale to palaT kar nahīñ aate 'nāzim'

phir bhī baiThe haiñ nigāhoñ ko sū-e-rāh kiye

zindagi hum ne teri jhuTi numaish ke liye

kitne sangin haqaeq ke gale ghonT diye

hum ne kuchh shoKH ujalon ki hawa mein aakar

apni sanjida-nigahi ke bujha Dale diye

mere armanon ki shabnam tere ruKHsar ki dhup

aur kya chahiye shadabi-e-gulshan ke liye

kuchh hamin KHwab ke mare the na chaunke warna

teri aamad ke saweron ne to paigham diye

waqt-e-be-rahm ka andaz-e-karam to dekho

jin ko aaine diye dard ke chehre na diye

tere daman mein to hai subh-e-daraKHshan ki bahaar

ai shab-e-tar magar zahr tera kaun piye

zindagi raqs par aamada hui hai jab bhi

waqt ne halqa-e-zanjir ke bal toD diye

jaane wale to palaT kar nahin aate 'nazim'

phir bhi baiThe hain nigahon ko su-e-rah kiye