zindagi har zawiye har ruKH se samjhati rahi

zindagī har zāviye har ruḳh se samjhātī rahī

hosh meñ aa jaao vo aglī havā jaatī rahī

mo'jiza thā har du'ā meñ jab na thī koī ġharaz

haath phailā.e to tāsīr-e-du'ā jaatī rahī

pahuñche manzil tak magar ham kis tarah pahuñche na pūchh

har qadam par paañv se zanjīr Takrātī rahī

aas vā'de ḳhvāb armāñ ārzūeñ hasrateñ

zindagī kyā kyā khilaune de ke bahlātī rahī

yuuñ to ye duniyā thī har pahlū se nāsūr-e-nazar

'umr bhar lekin tabī'at thī ki lalchātī rahī

apnī fitrat hī meñ akkhaḌpan hai is ko kyā kareñ

shahr meñ rah kar bhī ye kambaḳht dehātī rahī

kis bulandī par thā pahle aaj kis pastī meñ huuñ

fikr ye 'bedil' mujhe ghun kī tarah khātī rahī

zindagi har zawiye har ruKH se samjhati rahi

hosh mein aa jao wo agli hawa jati rahi

mo'jiza tha har du'a mein jab na thi koi gharaz

hath phailae to tasir-e-du'a jati rahi

pahunche manzil tak magar hum kis tarah pahunche na puchh

har qadam par panw se zanjir Takraati rahi

aas wa'de KHwab arman aarzuen hasraten

zindagi kya kya khilaune de ke bahlati rahi

yun to ye duniya thi har pahlu se nasur-e-nazar

'umr bhar lekin tabi'at thi ki lalchati rahi

apni fitrat hi mein akkhaDpan hai is ko kya karen

shahr mein rah kar bhi ye kambaKHt dehati rahi

kis bulandi par tha pahle aaj kis pasti mein hun

fikr ye 'bedil' mujhe ghun ki tarah khati rahi