زندگی ہر زاویے ہر رخ سے سمجھاتی رہی

زندگی ہر زاویے ہر رخ سے سمجھاتی رہی

ہوش میں آ جاؤ وہ اگلی ہوا جاتی رہی

معجزہ تھا ہر دعا میں جب نہ تھی کوئی غرض

ہاتھ پھیلائے تو تاثیر دعا جاتی رہی

پہنچے منزل تک مگر ہم کس طرح پہنچے نہ پوچھ

ہر قدم پر پاؤں سے زنجیر ٹکراتی رہی

آس وعدے خواب ارماں آرزوئیں حسرتیں

زندگی کیا کیا کھلونے دے کے بہلاتی رہی

یوں تو یہ دنیا تھی ہر پہلو سے ناسور نظر

عمر بھر لیکن طبیعت تھی کہ للچاتی رہی

اپنی فطرت ہی میں اکھڑ پن ہے اس کو کیا کریں

شہر میں رہ کر بھی یہ کمبخت دیہاتی رہی

کس بلندی پر تھا پہلے آج کس پستی میں ہوں

فکر یہ بیدلؔ مجھے گھن کی طرح کھاتی رہی