zindagi hi zindagi chaaron taraf hai

zindagī hī zindagī chāroñ taraf hai

aañkh ho to raushnī chāroñ taraf hai

kyā zamīñ kyā āsmāñ kyā dasht-o-dariyā

aadmī kī bartarī chāroñ taraf hai

ek markaz par Thahartā hī nahīñ hai

zehn kī āvārgī chāroñ taraf hai

dekhiye to hai ujālā hī ujālā

sochiye to tīrgī chāroñ taraf hai

aañkh se ojhal tirā chehra hai lekin

ik alāmat sī tirī chāroñ taraf hai

kuchh na kuchh hai āj-kal meñ hone vaalā

ik mukammal ḳhāmushī chāroñ taraf hai

chhoḌ kar jaate ho ghar 'ma.asūm' sāhab

soch lo duniyā yahī chāroñ taraf hai

zindagi hi zindagi chaaron taraf hai

aankh ho to raushni chaaron taraf hai

kya zamin kya aasman kya dasht-o-dariya

aadmi ki bartari chaaron taraf hai

ek markaz par Thaharta hi nahin hai

zehn ki aawargi chaaron taraf hai

dekhiye to hai ujala hi ujala

sochiye to tirgi chaaron taraf hai

aankh se ojhal tera chehra hai lekin

ek alamat si teri chaaron taraf hai

kuchh na kuchh hai aaj-kal mein hone wala

ek mukammal KHamushi chaaron taraf hai

chhoD kar jate ho ghar 'masum' sahab

soch lo duniya yahi chaaron taraf hai