zindagi hosh ki duniya se juda lagti hai

zindagī hosh kī duniyā se judā lagtī hai

jab kisī dāman-e-gul-rū kī havā lagtī hai

shukriya terī navāzish kā magar kyā kahiye

ye navāzish bhī to ik tarz-e-jafā lagtī hai

is chaman-zār-e-mohabbbat meñ hameñ ai hamdam

apnī hastī bhī kisī gul kī duā lagtī hai

ham ko be-raunaqī-e-shām-e-tamannā taslīm

aap kī sub.h bhī māñge kā diyā lagtī hai

kyā qayāmat hai ki be-rāh-ravī bhī ham ko

vaj.h-e-shā.istagī-e-fikr-o-navā lagtī hai

mujh se miltī hai to katrā ke nikal jaatī hai

har ḳhushī chashm-e-taġhāful kī adā lagtī hai

ho jo mānūs tabassum kī kiran se 'nāzim'

dil kī har fikr ujāloñ kī navā lagtī hai

zindagi hosh ki duniya se juda lagti hai

jab kisi daman-e-gul-ru ki hawa lagti hai

shukriya teri nawazish ka magar kya kahiye

ye nawazish bhi to ek tarz-e-jafa lagti hai

is chaman-zar-e-mohabbbat mein hamein ai hamdam

apni hasti bhi kisi gul ki dua lagti hai

hum ko be-raunaqi-e-sham-e-tamanna taslim

aap ki subh bhi mange ka diya lagti hai

kya qayamat hai ki be-rah-rawi bhi hum ko

wajh-e-shaistagi-e-fikr-o-nawa lagti hai

mujh se milti hai to katra ke nikal jati hai

har KHushi chashm-e-taghaful ki ada lagti hai

ho jo manus tabassum ki kiran se 'nazim'

dil ki har fikr ujalon ki nawa lagti hai