زندگی ہوش کی دنیا سے جدا لگتی ہے

زندگی ہوش کی دنیا سے جدا لگتی ہے

جب کسی دامن گل رو کی ہوا لگتی ہے

شکریہ تیری نوازش کا مگر کیا کہئے

یہ نوازش بھی تو اک طرز جفا لگتی ہے

اس چمن زار محبت میں ہمیں اے ہمدم

اپنی ہستی بھی کسی گل کی دعا لگتی ہے

ہم کو بے رونقیٔ شام تمنا تسلیم

آپ کی صبح بھی مانگے کا دیا لگتی ہے

کیا قیامت ہے کہ بے راہروی بھی ہم کو

وجہ شائستگئ فکر و نوا لگتی ہے

مجھ سے ملتی ہے تو کترا کے نکل جاتی ہے

ہر خوشی چشم تغافل کی ادا لگتی ہے

ہو جو مانوس تبسم کی کرن سے ناظمؔ

دل کی ہر فکر اجالوں کی نوا لگتی ہے