زندگی اک حباب ہے جیسے

زندگی اک حباب ہے جیسے

اک سہانا سا خواب ہے جیسے

اس کے وعدے کا اعتبار عبث

وہ سراسر سراب ہے جیسے

حسن کی یہ شگفتگی واللہ

ایک تازہ گلاب ہے جیسے

دل عاشق میں جھانک کر دیکھو

کوئی خانہ خراب ہے جیسے

پیٹھ پیچھے کسی کی بد گوئی

آج کار ثواب ہے جیسے

مسکرانا وہ زیر لب ان کا

میرا یوم حساب ہے جیسے

اپنا ماضی وہ بھول بیٹھا ہے

خاندانی نواب ہے جیسے

صنف نازک کی اف یہ عریانی

ذہن و دل کا عذاب ہے جیسے

باب اس کے ہیں مختلف اے شاذؔ

زیست میری کتاب ہے جیسے