زندگی جب بھی ملا کرتی ہے

زندگی جب بھی ملا کرتی ہے

جانے کیوں مجھ پہ ہنسا کرتی ہے

ہائے کیا شخص تھا مرنے والا

زندگی یاد کیا کرتی ہے

مسکراتا ہے کہیں اور وہ شخص

روشنی دل میں ہوا کرتی ہے

ہم بزرگان ادب ہیں ہم سے

زندگی جھک کے ملا کرتی ہے

جب سے بچھڑا ہے وہ سر تا پا غزل

زندگی شعر کہا کرتی ہے

زندگی بھی تری چاہت کی طرح

ایک ہی بار ملا کرتی ہے

زندگی اک تو ملی مجھ کو ادھار

وہ بھی بیمار رہا کرتی ہے

کیا مہذب ہے ہوا بھی اب کے

سر سے دستار جدا کرتی ہے