zindagi jabr-e-musalsal hai magar jari hai

zindagī jabr-e-musalsal hai magar jaarī hai

yuuñ samajhiye ke azal se mirī tayyārī hai

vahī dīvār jahāñ dar ki thī ḳhvāhish mujh ko

maiñ ne duniyā usī dīvār pe de maarī hai

ye bhī taqdīr kā ehsān ke ham jaise log

saañs bhī khīñcheñ to lagtā hai adā-kārī hai

phir vahī husn ne parde ko kiyā hai rusvā

phir vahī turfa tamāsha vahī 'ayyārī hai

tab bhī zālim ki himāyat meñ nahīñ thā 'jānī'

ab bhī darbār meñ lahja mirā inkārī hai

zindagi jabr-e-musalsal hai magar jari hai

yun samajhiye ke azal se meri tayyari hai

wahi diwar jahan dar ki thi KHwahish mujh ko

main ne duniya usi diwar pe de mari hai

ye bhi taqdir ka ehsan ke hum jaise log

sans bhi khinchen to lagta hai ada-kari hai

phir wahi husn ne parde ko kiya hai ruswa

phir wahi turfa tamasha wahi 'ayyari hai

tab bhi zalim ki himayat mein nahin tha 'jaani'

ab bhi darbar mein lahja mera inkari hai