zindagi jaisa lubhaungi chali jaungi

zindagī jaisā lubhā.ūñgī chalī jā.ūñgī

maiñ tire ḳhvāb meñ ā.ūñgī chalī jā.ūñgī

us ne dekhā hī nahīñ azm-e-musammam merā

hijr oḌhūñgī bichhā.ūñgī chalī jā.ūñgī

ye kahānī to musannif kī chalegī barsoñ

maiñ to kirdār nibhā.uñgī chalī jā.ūñgī

maiñ vo jugnū huuñ jo tāroñ ke sahāre ke baġhair

bahr-e-zulmāt miTā.ūñgī chalī jā.ūñgī

zindagī mujh ko zarā itnī to mohlat denā

sham-e-ummīd jalā.ūñgī chalī jā.ūñgī

jaañ luTānī bhī paḌī mujh ko vatan par jo kabhī

ḳhaak māthe pe lagā.uñgī chalī jā.ūñgī

ik nazar dekh leñ bas ye mirī āñkheñ tujh ko

ahd phir apnā nibhā.uñgī chalī jā.ūñgī

dil mirā ho gayā jazbāt se aarī 'mīnā'

ashk bhī ab na bahā.ūñgī chalī jā.ūñgī

zindagi jaisa lubhaungi chali jaungi

main tere KHwab mein aaungi chali jaungi

us ne dekha hi nahin azm-e-musammam mera

hijr oDhungi bichhaungi chali jaungi

ye kahani to musannif ki chalegi barson

main to kirdar nibhaungi chali jaungi

main wo jugnu hun jo taron ke sahaare ke baghair

bahr-e-zulmat miTaungi chali jaungi

zindagi mujh ko zara itni to mohlat dena

sham-e-ummid jalaungi chali jaungi

jaan luTani bhi paDi mujh ko watan par jo kabhi

KHak mathe pe lagaungi chali jaungi

ek nazar dekh len bas ye meri aankhen tujh ko

ahd phir apna nibhaungi chali jaungi

dil mera ho gaya jazbaat se aari 'mina'

ashk bhi ab na bahaungi chali jaungi