zindagi jhul rahi hai ba-salib-e-dauran

zindagī jhuul rahī hai ba-salīb-e-daurāñ

kyoñ na angusht-ba-dandāñ ho tabīb-e-daurāñ

jauhar-e-sabr ne dekhā ba-nigāh-e-tahsīñ

manzar-e-ām pe aayā jo ġharīb-e-daurāñ

be-adab lagtā hai duniyā-e-adab kā māhaul

shā.ir-e-asr se uljhā hai adīb-e-daurāñ

chehra-e-vaqt tirī parda-kushā.ī kar ke

ham ne har daur meñ palTā hai nasīb-e-daurāñ

tarjumān-e-ġham-e-hastī hai 'sabā' jis kā dimāġh

chashm-e-bīnā meñ vo shā.ir hai naqīb-e-daurāñ

zindagi jhul rahi hai ba-salib-e-dauran

kyon na angusht-ba-dandan ho tabib-e-dauran

jauhar-e-sabr ne dekha ba-nigah-e-tahsin

manzar-e-am pe aaya jo gharib-e-dauran

be-adab lagta hai duniya-e-adab ka mahaul

shair-e-asr se uljha hai adib-e-dauran

chehra-e-waqt teri parda-kushai kar ke

hum ne har daur mein palTa hai nasib-e-dauran

tarjuman-e-gham-e-hasti hai 'saba' jis ka dimagh

chashm-e-bina mein wo shair hai naqib-e-dauran