zindagi jitne tere chahne wale honge

zindagī jitne tire chāhne vaale hoñge

ik na ik din vo kisī ġham ke havāle hoñge

shart ye hai ki koī sham’-e-tamannā na jale

rāh-e-mastī meñ har ik samt ujāle hoñge

jis par ai dost tirī chashm-e-'ināyat hogī

us ke andāz hī duniyā se nirāle hoñge

ham ne sochā bhī nahīñ thā ki bichhaḌ kar un se

rāhat-e-jāñ to alag jaan ke laale hoñge

us kī nazreñ hī batā saktī haiñ sachchī qīmat

jis ne motī tah-e-dariyā se nikāle hoñge

ham ko mā'lūm na thī rasm-e-mohabbat ai dost

joḌne vaale hī dil toḌne vaale hoñge

jin maqāmāt pe ham un se mile the 'gulshan'

ik na ik din vahāñ tā'mīr shivāle hoñge

zindagi jitne tere chahne wale honge

ek na ek din wo kisi gham ke hawale honge

shart ye hai ki koi sham’-e-tamanna na jale

rah-e-masti mein har ek samt ujale honge

jis par ai dost teri chashm-e-'inayat hogi

us ke andaz hi duniya se nirale honge

hum ne socha bhi nahin tha ki bichhaD kar un se

rahat-e-jaan to alag jaan ke lale honge

us ki nazren hi bata sakti hain sachchi qimat

jis ne moti tah-e-dariya se nikale honge

hum ko ma'lum na thi rasm-e-mohabbat ai dost

joDne wale hi dil toDne wale honge

jin maqamat pe hum un se mile the 'gulshan'

ek na ek din wahan ta'mir shiwale honge