zindagi ka koi hasil hi nahin

zindagī kā koī hāsil hī nahīñ

ye vo jaada hai ki manzil hī nahīñ

har taraf chhā.ī huī afsurdagī

mahfiloñ meñ rang mahfil meñ nahīñ

chaltī to hai kashtī-e-umr-e-ravāñ

bahr-e-nākāmī kā sāhil hī nahīñ

tark to kar duuñ maiñ ranj-e-āshiqī

kyā karūñ qaabū meñ jab dil hī nahīñ

najd kī rāhoñ meñ ab majnūñ kahāñ

jabki lailā aur mahmil hī nahīñ

ġham hī ham-āhang-e-fitrat ho to ho

ai ḳhushī maiñ tere qābil hī nahīñ

soz-e-parvāna to hai apnī jagah

jalva-ārā sham-e-mahfil hī nahīñ

jalva-e-sad-rang aa.e kyā nazar

aa.ina koī muqābil hī nahīñ

lā-makāñ meñ ho to shāyad ho maqām

donoñ aalam merī manzil hī nahīñ

luT na jaa.e kārvān-e-zindagī

paas mere jab mirā dil hī nahīñ

ḳhizr-e-rah kī kyoñ mujhe hai justujū

rāhbar jab jazb-e-kāmil hī nahīñ

kis liye 'mehdī' lagī mere gale

zindagī maiñ jis ke qābil hī nahīñ

zindagi ka koi hasil hi nahin

ye wo jada hai ki manzil hi nahin

har taraf chhai hui afsurdagi

mahfilon mein rang mahfil mein nahin

chalti to hai kashti-e-umr-e-rawan

bahr-e-nakaami ka sahil hi nahin

tark to kar dun main ranj-e-ashiqi

kya karun qabu mein jab dil hi nahin

najd ki rahon mein ab majnun kahan

jabki laila aur mahmil hi nahin

gham hi ham-ahang-e-fitrat ho to ho

ai KHushi main tere qabil hi nahin

soz-e-parwana to hai apni jagah

jalwa-ara sham-e-mahfil hi nahin

jalwa-e-sad-rang aae kya nazar

aaina koi muqabil hi nahin

la-makan mein ho to shayad ho maqam

donon aalam meri manzil hi nahin

luT na jae karwan-e-zindagi

pas mere jab mera dil hi nahin

KHizr-e-rah ki kyon mujhe hai justuju

rahbar jab jazb-e-kaamil hi nahin

kis liye 'mehdi' lagi mere gale

zindagi main jis ke qabil hi nahin