zindagi ke aaKHiri lamhe KHushi se bhar gaya

zindagī ke āḳhirī lamhe ḳhushī se bhar gayā

ek din itnā hañsā vo hañste hañste mar gayā

bujh gayā ehsās taarī hai sukūt-e-be-hisī

dard kā daftar gayā sāmān-e-shor-o-shar gayā

shaḳhs-e-māmūlī mirā jo māl-e-vāfir chhoḌ kar

marte marte tohmateñ chand apne zimme dhar gayā

is qadar sanjīda thā vo daf.atan būḌhā huā

aur phir ik dopahar biivī ko beva kar gayā

dūrdarshan par tarab āgīñ tamāshā dekh kar

ḳhush huā vo is qadar maare ḳhushī ke mar gayā

dar haqīqat maut kā matlab to hai naql-e-makāñ

jis tarah kamre ke andar se koī bāhar gayā

kirshn 'mohan' ye bhī hai kaisā akelā-pan ki log

maut se Darte haiñ maiñ to zindagī se Dar gayā

zindagi ke aaKHiri lamhe KHushi se bhar gaya

ek din itna hansa wo hanste hanste mar gaya

bujh gaya ehsas tari hai sukut-e-be-hisi

dard ka daftar gaya saman-e-shor-o-shar gaya

shaKHs-e-mamuli mera jo mal-e-wafir chhoD kar

marte marte tohmaten chand apne zimme dhar gaya

is qadar sanjida tha wo dafatan buDha hua

aur phir ek dopahar biwi ko bewa kar gaya

durdarshan par tarab aagin tamasha dekh kar

KHush hua wo is qadar mare KHushi ke mar gaya

dar haqiqat maut ka matlab to hai naql-e-makan

jis tarah kamre ke andar se koi bahar gaya

kirshn 'mohan' ye bhi hai kaisa akela-pan ki log

maut se Darte hain main to zindagi se Dar gaya