zindagi ke gham lakhon aur chashm-e-nam tanha

zindagī ke ġham lākhoñ aur chashm-e-nam tanhā

hasratoñ kī mayyat par ro rahe haiñ ham tanhā

mil sakā na koī bhī ham-safar zamāne meñ

kāTte rahe barsoñ jāda-e-alam tanhā

khel to nahīñ yaaro rāste kī tanhā.ī

koī ham ko dikhlā.e chal ke do-qadam tanhā

dil ko chheḌtī hogī yād-e-raftagāñ aksar

laakh jī ko bahlā.eñ shaiḳh-e-mohtaram tanhā

masjideñ tarastī haiñ us taraf azānoñ ko

is taraf shivāloñ meñ rah ga.e sanam tanhā

is bharī ḳhudā.ī meñ vo bhī aaj akele haiñ

ḳhalvatoñ meñ rah kar bhī jo rahe the kam tanhā

thī 'qatīl' chāhat meñ un kī bhī razā shāmil

phir bhī ham hī Thahre haiñ morid-e-sitam tanhā

zindagi ke gham lakhon aur chashm-e-nam tanha

hasraton ki mayyat par ro rahe hain hum tanha

mil saka na koi bhi ham-safar zamane mein

kaTte rahe barson jada-e-alam tanha

khel to nahin yaro raste ki tanhai

koi hum ko dikhlae chal ke do-qadam tanha

dil ko chheDti hogi yaad-e-raftagan aksar

lakh ji ko bahlaen shaiKH-e-mohtaram tanha

masjiden tarasti hain us taraf azanon ko

is taraf shiwalon mein rah gae sanam tanha

is bhari KHudai mein wo bhi aaj akele hain

KHalwaton mein rah kar bhi jo rahe the kam tanha

thi 'qatil' chahat mein un ki bhi raza shamil

phir bhi hum hi Thahre hain morid-e-sitam tanha