zindagi ke saz par jalte hue naghmat hain

zindagī ke saaz par jalte hue naġhmāt haiñ

raqs-farmā sho.ala-e-dil kī tarah zarrāt haiñ

haiñ bagūloñ kī tarah tār-e-nafas bahke hue

zindagānī kī junūñ-parvar sabhī āyāt haiñ

nāz-farmā jin kī tābānī pe thī aql-e-bashar

aaj vo ḳhurshīd-o-anjum kitne kam-auqāt haiñ

ham ki the dildārī-e-mauj-e-havādis par nisār

shor-e-tūfāñ se ayādat dil-nashīñ jazbāt haiñ

jin ko rakhtī thī mo.attar terī yādoñ kī shamīm

teġh kī jhankār meñ gum vo hasīñ din-rāt haiñ

vaqt kī mehrāb meñ ik sham-e-nau raushan kareñ

rāzdān-e-ārzū ham vāris-e-āfāt haiñ

kaun DhūñDe garmī-e-ruḳhsār-e-ḳhūbāñ ai 'sarosh'

ātish-e-paikār se sho.ala-fagan jazbāt haiñ

zindagi ke saz par jalte hue naghmat hain

raqs-farma shoala-e-dil ki tarah zarraat hain

hain bagulon ki tarah tar-e-nafas bahke hue

zindagani ki junun-parwar sabhi aayat hain

naz-farma jin ki tabani pe thi aql-e-bashar

aaj wo KHurshid-o-anjum kitne kam-auqat hain

hum ki the dildari-e-mauj-e-hawadis par nisar

shor-e-tufan se ayaadat dil-nashin jazbaat hain

jin ko rakhti thi moattar teri yaadon ki shamim

tegh ki jhankar mein gum wo hasin din-raat hain

waqt ki mehrab mein ek sham-e-nau raushan karen

raazdan-e-arzu hum waris-e-afat hain

kaun DhunDe garmi-e-ruKHsar-e-KHuban ai 'sarosh'

aatish-e-paikar se shoala-fagan jazbaat hain