zindagi Khaar hai gulab bhi hai

zindagī ḳhaar hai gulāb bhī hai

zindagī zindagī hai ḳhvāb bhī hai

pyaar gangā kī tarah hai lekin

pyaar sahrāoñ kā sarāb bhī hai

kisī insān kī madad ke liye

jhuuT kā bolnā savāb bhī hai

muskurāhaT to dekh bachchoñ kī

is se behtar koī kitāb bhī hai

is siyāhī pe tū yaqīñ mat kar

is añdhere meñ āftāb bhī hai

chhū ke dil us ne haath ko chūmā

is adā kā koī javāb bhī hai

baat 'svāmī' kī talḳh hai phir bhī

baat socho to lā-javāb bhī hai

zindagi KHar hai gulab bhi hai

zindagi zindagi hai KHwab bhi hai

pyar ganga ki tarah hai lekin

pyar sahraon ka sarab bhi hai

kisi insan ki madad ke liye

jhuT ka bolna sawab bhi hai

muskurahaT to dekh bachchon ki

is se behtar koi kitab bhi hai

is siyahi pe tu yaqin mat kar

is andhere mein aaftab bhi hai

chhu ke dil us ne hath ko chuma

is ada ka koi jawab bhi hai

baat 'swami' ki talKH hai phir bhi

baat socho to la-jawab bhi hai