zindagi Khaar-zar mein guzri

zindagī ḳhār-zār meñ guzrī

justajū-e-bahār meñ guzrī

kuchh to paimān-e-yār meñ guzrī

aur kuchh e'tibār meñ guzrī

manzil-e-zīst ham se sar na huī

yād-e-gesū-e-yār meñ guzrī

phuul giryāñ the har kalī larzāñ

jaane kaisī bahār meñ guzrī

zindagānī tavīl thī lekin

maut ke intizār meñ guzrī

aap se mil ke zindagī apnī

justujū-e-qarār meñ guzrī

jo bhī guzrī burī bhalī 'sānī'

aap ke iḳhtiyār meñ guzrī

zindagi KHar-zar mein guzri

justaju-e-bahaar mein guzri

kuchh to paiman-e-yar mein guzri

aur kuchh e'tibar mein guzri

manzil-e-zist hum se sar na hui

yaad-e-gesu-e-yar mein guzri

phul giryan the har kali larzan

jaane kaisi bahaar mein guzri

zindagani tawil thi lekin

maut ke intizar mein guzri

aap se mil ke zindagi apni

justuju-e-qarar mein guzri

jo bhi guzri buri bhali 'sani'

aap ke iKHtiyar mein guzri