zindagi KHugar-e-sadmat kahan thi pahle

zindagī ḳhūgar-e-sadmāt kahāñ thī pahle

itnī majbūri-e-hālāt kahāñ thī pahle

merī mushtāq-nigāhī kā karishma hai ye

aap ke husn meñ ye baat kahāñ thī pahle

ye to nairang-tarāzī mire ehsās kī hai

fasl-e-gul bādal-o-barsāt kahāñ thī pahle

sadqa-e-ahl-e-junūñ hai ye bahār-e-gulshan

bū-e-gul maz.har-e-jazbāt kahāñ thī pahle

aap ke ishq ne ma.arūf kiyā hai mujh ko

itnī mash.hūr mirī zaat kahāñ thī pahle

mai-kashī laa.ī hai mujh ko dar-e-mai-ḳhāna tak

varna saaqī se mulāqāt kahāñ thī pahle

phir diyā ranj butoñ ne tumheñ shāyad 'naġhmī'

lab pe din-rāt munājāt kahāñ thī pahle

zindagi KHugar-e-sadmat kahan thi pahle

itni majburi-e-haalat kahan thi pahle

meri mushtaq-nigahi ka karishma hai ye

aap ke husn mein ye baat kahan thi pahle

ye to nairang-taraazi mere ehsas ki hai

fasl-e-gul baadal-o-barsat kahan thi pahle

sadqa-e-ahl-e-junun hai ye bahaar-e-gulshan

bu-e-gul mazhar-e-jazbaat kahan thi pahle

aap ke ishq ne maruf kiya hai mujh ko

itni mashhur meri zat kahan thi pahle

mai-kashi lai hai mujh ko dar-e-mai-KHana tak

warna saqi se mulaqat kahan thi pahle

phir diya ranj buton ne tumhein shayad 'naghmi'

lab pe din-raat munajat kahan thi pahle