زندگی خواب دکھاتی ہے ابھی تک مجھ کو

زندگی خواب دکھاتی ہے ابھی تک مجھ کو

اپنی آنکھوں پہ کئی بار ہوا شک مجھ کو

آدمی خاک ہوا جاتا ہے دل کے ہاتھوں

اس کی گلیوں میں پھراتا ہے یہ بالک مجھ کو

میں نے بھی خود کو تماشائی سمجھ رکھا ہے

تو بھلے روز دکھاتا رہے ناٹک مجھ کو

اک تھکن ہے کہ جو ہر روز بڑھی جاتی ہے

میرے اعصاب سنبھالیں گے کہاں تک مجھ کو

اب دکھائی نہیں دیتا ہے کوئی بھی چہرہ

اب سنائی نہیں دیتی کوئی دستک مجھ کو

چلتے چلتے ہی کسی موڑ پہ آ جائے گی شام

چھوڑ جائے گا یہ سایہ بھی اچانک مجھ کو