zindagi ki be-tahasha uljhanon ke darmiyan

zindagī kī be-tahāshā uljhanoñ ke darmiyāñ

DhūñD kuchh fursat ke lamhe mushkiloñ ke darmiyāñ

tere alfāz-e-masīhā.ī ne marham rakh diyā

ghir chukī thī zindagī jab hādsoñ ke darmiyāñ

chand kāñTe bhī chubhe lekin mudāvā ho gayā

zindagī kī kuchh gulābī sā'atoñ ke darmiyāñ

mujh ko aayā hī nahīñ tujh se bichhaḌne kā ḳhayāl

ziist ke har pal badalte mausamoñ ke darmiyāñ

tere dil kā khoT terī bevafā.ī kā pata

mil gayā thā vasl kī yaḳh sā'atoñ ke darmiyāñ

ham pai-dar-pai hādsoñ meñ muskurāte kyā bhalā

kuchh ḳhushī ke pal mile jab sānehoñ ke darmiyāñ

mujh ko pal pal yuuñ satāyā rāste kī dhuul ne

saañs tak lenā thā mushkil rāstoñ ke darmiyāñ

zindagī taqsīm ho kar rah ga.ī 'shamsa' mirī

chāhatoñ ke biich behad shohratoñ ke darmiyāñ

zindagi ki be-tahasha uljhanon ke darmiyan

DhunD kuchh fursat ke lamhe mushkilon ke darmiyan

tere alfaz-e-masihai ne marham rakh diya

ghir chuki thi zindagi jab hadson ke darmiyan

chand kanTe bhi chubhe lekin mudawa ho gaya

zindagi ki kuchh gulabi sa'aton ke darmiyan

mujh ko aaya hi nahin tujh se bichhaDne ka KHayal

zist ke har pal badalte mausamon ke darmiyan

tere dil ka khoT teri bewafai ka pata

mil gaya tha wasl ki yaKH sa'aton ke darmiyan

hum pai-dar-pai hadson mein muskuraate kya bhala

kuchh KHushi ke pal mile jab sanehon ke darmiyan

mujh ko pal pal yun sataya raste ki dhul ne

sans tak lena tha mushkil raston ke darmiyan

zindagi taqsim ho kar rah gai 'shamsa' meri

chahaton ke bich behad shohraton ke darmiyan