زندگی کی ہے ضرورت پیٹ بھرنا چاہئے

زندگی کی ہے ضرورت پیٹ بھرنا چاہئے

پیٹ بھرنے کے لیے کچھ کام کرنا چاہئے

صرف خوابوں کا حسیں ہونا یہاں کافی نہیں

خواب پورا کرنے کو حد سے گزرنا چاہئے

عشق میں دل ٹوٹ جائے یہ تو ممکن ہے مگر

کیا ضروری ٹوٹ کر سب کو بکھرنا چاہئے

جو عطا کی ہے خدا نے زندگی اتنی رہے

کیوں کسی کو بھی یہاں بے موت مرنا چاہئے

اب سزا کی بات سن کے ڈر رہے ہیں آپ کیوں

آپ کو ظلم و ستم کے وقت ڈرنا چاہئے

التجا کرتے ہوئے پیاسا پرندہ مر گیا

اب تو دریا کو حیا سے ڈوب مرنا چاہئے