زندگی کی ہر ادا سے ہو چلے ہم آشنا

زندگی کی ہر ادا سے ہو چلے ہم آشنا

دل بھی ہے غم آشنا آنکھیں بھی ماتم آشنا

دشمنوں کی دشمنی تو سامنے کی بات تھی

دوستوں کی مصلحت سے ہم بھی تھے کم آشنا

یوں تو اک صدیوں کا ماضی ہے نظر کے سامنے

آنے والے کل کے لمحوں سے نہیں ہم آشنا

اب کوئی نا آشنا تک بھی نہیں پرسان حال

حاشیہ رکھتے تھے جن کے گرد ہر دم آشنا

جانے کیا لغزش ہوئی ہم سے کہ برہم ہیں سبھی

ہم نوا ہمدرد واقف کار محرم آشنا

پرسش احباب ہی ان کا مداوا ہو تو ہو

ورنہ دل کے زخم کب ہوتے ہیں مرہم آشنا

کامراں بھی لوٹتے افضلؔ تو ہونا تھا یہی

پھر بھی خوش ہو کر نہ کرتے خیر مقدم آشنا