zindagi ki har ada se ho chale hum aashna

zindagī kī har adā se ho chale ham āshnā

dil bhī hai ġham-āshnā āñkheñ bhī mātam-āshnā

dushmanoñ kī dushmanī to sāmne kī baat thī

dostoñ kī maslahat se ham bhī the kam āshnā

yuuñ to ik sadiyoñ kā maazī hai nazar ke sāmne

aane vaale kal ke lamhoñ se nahīñ ham āshnā

ab koī nā-āshnā tak bhī nahīñ pursān-e-hāl

hāshiya rakhte the jin ke gird har dam āshnā

jaane kyā laġhzish huī ham se ki barham haiñ sabhī

ham-navā hamdard vāqif-kār mahram āshnā

pursish-e-ahbāb hī in kā mudāvā ho to ho

varna dil ke zaḳhm kab hote haiñ marham-āshnā

kāmrāñ bhī lauTte 'afzal' to honā thā yahī

phir bhī ḳhush ho kar na karte ḳhair-maqdam āshnā

zindagi ki har ada se ho chale hum aashna

dil bhi hai gham-ashna aankhen bhi matam-ashna

dushmanon ki dushmani to samne ki baat thi

doston ki maslahat se hum bhi the kam aashna

yun to ek sadiyon ka mazi hai nazar ke samne

aane wale kal ke lamhon se nahin hum aashna

ab koi na-ashna tak bhi nahin pursan-e-haal

hashiya rakhte the jin ke gird har dam aashna

jaane kya laghzish hui hum se ki barham hain sabhi

ham-nawa hamdard waqif-kar mahram aashna

pursish-e-ahbab hi in ka mudawa ho to ho

warna dil ke zaKHm kab hote hain marham-ashna

kaamran bhi lauTte 'afzal' to hona tha yahi

phir bhi KHush ho kar na karte KHair-maqdam aashna