zindagi kitni aadmi ki hai

zindagī kitnī aadmī kī hai

sach batā.ūñ to do-ghaḌī kī hai

raushnī jaisī harf meñ us ke

saarī tāsīr ḳhush-labī kī hai

kyoñ yahāñ har taraf añdherā hai

mamlikat ye to raushnī kī hai

apne hī ghar meñ rah rahā huuñ magar

ye rihā.ish ik ajnabī kī hai

merī hālat pe dukh to hai us ko

par kamī aañkh meñ namī kī hai

hai jo sāzish mire miTāne kī

ye nahīñ ek kī ka.ī kī hai

tez chal kar bhī chhāñv kyā miltī

dasht meñ dauḌ dhuup hī kī hai

chāñd sūraj hoñ donoñ hāthoñ meñ

ye tamanna to har kisī kī hai

ghūm-phir kar idhar hī aatā huuñ

kashish aisī tirī galī kī hai

ye jo hai mere paas daulat-e-ġham

ye 'atā kī huī usī kī hai

zindagi kitni aadmi ki hai

sach bataun to do-ghaDi ki hai

raushni jaisi harf mein us ke

sari tasir KHush-labi ki hai

kyon yahan har taraf andhera hai

mamlikat ye to raushni ki hai

apne hi ghar mein rah raha hun magar

ye rihaish ek ajnabi ki hai

meri haalat pe dukh to hai us ko

par kami aankh mein nami ki hai

hai jo sazish mere miTane ki

ye nahin ek ki kai ki hai

tez chal kar bhi chhanw kya milti

dasht mein dauD dhup hi ki hai

chand suraj hon donon hathon mein

ye tamanna to har kisi ki hai

ghum-phir kar idhar hi aata hun

kashish aisi teri gali ki hai

ye jo hai mere pas daulat-e-gham

ye 'ata ki hui usi ki hai