زندگی کتنی آدمی کی ہے

زندگی کتنی آدمی کی ہے

سچ بتاؤں تو دو گھڑی کی ہے

روشنی جیسی حرف میں اس کے

ساری تاثیر خوش لبی کی ہے

کیوں یہاں ہر طرف اندھیرا ہے

مملکت یہ تو روشنی کی ہے

اپنے ہی گھر میں رہ رہا ہوں مگر

یہ رہائش اک اجنبی کی ہے

میری حالت پہ دکھ تو ہے اس کو

پر کمی آنکھ میں نمی کی ہے

ہے جو سازش مرے مٹانے کی

یہ نہیں ایک کی کئی کی ہے

تیز چل کر بھی چھاؤں کیا ملتی

دشت میں دوڑ دھوپ ہی کی ہے

چاند سورج ہوں دونوں ہاتھوں میں

یہ تمنا تو ہر کسی کی ہے

گھوم پھر کر ادھر ہی آتا ہوں

کشش ایسی تری گلی کی ہے

یہ جو ہے میرے پاس دولت غم

یہ عطا کی ہوئی اسی کی ہے