zindagi ko ek KHwab-e-raegan samjha tha main

zindagī ko ek ḳhvāb-e-rā.egāñ samjhā thā maiñ

be-karāñ tā'bīr hogī ye kahāñ samjhā thā maiñ

rāh-rau guzre chale jaate the rāh-e-zīst par

ik hujūm-e-jism-o-jāñ ko kārvāñ samjhā thā maiñ

itnī nazdīkī ki jaise chhū rahā huuñ ḳhud ko maiñ

harz-e-jāñ hai vo jise vahm-o-gumāñ samjhā thā maiñ

thā bahut saffāk tansīḳh-e-ta.alluq kā fareb

us kā 'ālam hai jise apnā jahāñ samjhā thā maiñ

be-talab āsūda kab hotī hai kisht-e-ārzū

be-gumāñ dil ho rahegā gulsitāñ samjhā thā maiñ

ik tavaqqo' thī ki ye lahja bhī samjhegā koī

chashm-e-ḳhūñ-afshāñ ko andāz-e-bayāñ samjhā thā maiñ

rabt-e-bāham thā faqat lafz-o-bayāñ kā irtibāt

hai koī rasm-e-vafā bhī darmiyāñ samjhā thā maiñ

is qadar mānūs thā fitrat ke lahje kā jamāl

so use apnā suḳhan apnī zabāñ samjhā thā maiñ

ye to haiñ ā.indagāñ kī raushnī ke dā.ere

in ko ab tak apne qadmoñ ke nishāñ samjhā thā maiñ

zindagi ko ek KHwab-e-raegan samjha tha main

be-karan ta'bir hogi ye kahan samjha tha main

rah-rau guzre chale jate the rah-e-zist par

ek hujum-e-jism-o-jaan ko karwan samjha tha main

itni nazdiki ki jaise chhu raha hun KHud ko main

harz-e-jaan hai wo jise wahm-o-guman samjha tha main

tha bahut saffak tansiKH-e-talluq ka fareb

us ka 'alam hai jise apna jahan samjha tha main

be-talab aasuda kab hoti hai kisht-e-arzu

be-guman dil ho rahega gulsitan samjha tha main

ek tawaqqo' thi ki ye lahja bhi samjhega koi

chashm-e-KHun-afshan ko andaz-e-bayan samjha tha main

rabt-e-baham tha faqat lafz-o-bayan ka irtibaat

hai koi rasm-e-wafa bhi darmiyan samjha tha main

is qadar manus tha fitrat ke lahje ka jamal

so use apna suKHan apni zaban samjha tha main

ye to hain aaindagan ki raushni ke daere

in ko ab tak apne qadmon ke nishan samjha tha main