zindagi ko ek rangin dastan samjha tha main

zindagī ko ek rañgīñ dāstāñ samjhā thā maiñ

zindagī bār-e-garāñ hai ye kahāñ samjhā thā maiñ

haañ vahī aañsū Tapak kar kitnā rusvā kar ga.e

jin ko apnā rāzdār-e-be-zabāñ samjhā thā maiñ

un kā dāman thaam kar kitne daraḳhshāñ ho ga.e

mere vo aañsū ki jin ko rā.egāñ samjhā thā maiñ

allāh allāh un ke paa.e naaz kā husn-e-ḳhirām

rahguzar thī un kī jis ko kahkashāñ samjhā thā maiñ

tah-ba-tah zulm-o-sitam kī ik ridā-e-nīl-gūñ

khīñch dī sar par jise haft āsmāñ samjhā thā maiñ

zindagi ko ek rangin dastan samjha tha main

zindagi bar-e-garan hai ye kahan samjha tha main

han wahi aansu Tapak kar kitna ruswa kar gae

jin ko apna raazdar-e-be-zaban samjha tha main

un ka daman tham kar kitne daraKHshan ho gae

mere wo aansu ki jin ko raegan samjha tha main

allah allah un ke pae naz ka husn-e-KHiram

rahguzar thi un ki jis ko kahkashan samjha tha main

tah-ba-tah zulm-o-sitam ki ek rida-e-nil-gun

khinch di sar par jise haft aasman samjha tha main