zindagi ko ek kahani chahiye

zindagī ko ik kahānī chāhiye

ḳhushk dariyā ko ravānī chāhiye

chuum le baḌh kar mirī tahrīr ko

mere lafzoñ ko ma'ānī chāhiye

kāmyābī na mile to na sahī

apnī qismat āzmānī chāhiye

bik rahī hai kauḌiyoñ meñ shā'irī

aap ko qīmat lagānī chāhiye

dekhne ke vāste bazm-e-jahāñ

sharm kā āñkhoñ meñ paanī chāhiye

aa.eñ jab palkoñ ke dastarḳhvān par

āñsuoñ kī mezbānī chāhiye

dūsroñ ke dil meñ rahne ke liye

shā'irī thoḌī sī aanī chāhiye

daad dete ho hamāre 'aib par

aap ko unglī uThānī chāhiye

chhīn le paimāna-e-suqrāt ko

gar hayāt-e-jāvedānī chāhiye

yaar ehsās-e-nadāmat ke liye

kuchh tirī āñkhoñ meñ paanī chāhiye

kaun utrā mere dil ke taur par

har nafas ko lan-tarānī chāhiye

masnad-e-shāhī mubārak aap ko

'dil' ko dil par hukmrānī chāhiye

zindagi ko ek kahani chahiye

KHushk dariya ko rawani chahiye

chum le baDh kar meri tahrir ko

mere lafzon ko ma'ani chahiye

kaamyabi na mile to na sahi

apni qismat aazmani chahiye

bik rahi hai kauDiyon mein sha'iri

aap ko qimat lagani chahiye

dekhne ke waste bazm-e-jahan

sharm ka aankhon mein pani chahiye

aaen jab palkon ke dastarKHwan par

aansuon ki mezbani chahiye

dusron ke dil mein rahne ke liye

sha'iri thoDi si aani chahiye

dad dete ho hamare 'aib par

aap ko ungli uThani chahiye

chhin le paimana-e-suqraat ko

gar hayat-e-jawedani chahiye

yar ehsas-e-nadamat ke liye

kuchh teri aankhon mein pani chahiye

kaun utra mere dil ke taur par

har nafas ko lan-tarani chahiye

masnad-e-shahi mubarak aap ko

'dil' ko dil par hukmrani chahiye