zindagi ko ek musalsal imtihan kahte rahe

zindagī ko ik musalsal imtihāñ kahte rahe

laġhzish-e-pā ko hī manzil kā nishāñ kahte rahe

maslahat thī yā ki thī vo ishq kī majbūriyāñ

us but-e-nā-mehrbāñ ko mehrbāñ kahte rahe

chupke chupke kah ga.ī jo dāstāñ ko dāstāñ

us nigāh-e-shauq ko ham be-zabāñ kahte rahe

ik tabassum ik nigah aur ek qatra ashk kā

bas inhīñ par kahne vaale dāstāñ kahte rahe

zard patte ḳhushk kaliyāñ phuul murjhā.e hue

ye haiñ aks-e-qalb-e-vīrāñ ham ḳhizāñ kahte rahe

apne hī zauq-e-nazar ne baḳhshī un ko dilbarī

varna kyā hai jis ko ham husn-e-butāñ kahte rahe

gosha-e-dil meñ vo mere sab simaT kar rah gayā

ġham kā ik tūfāñ jise ahl-e-jahāñ kahte rahe

jalva-gar rag rag meñ hai aur dīda-o-dil meñ nihāñ

ham jise ḳhalvat-nashīn-e-lā-makāñ kahte rahe

pyaar ke lamhe jo un kī bazm meñ guzre 'habīb'

ham hayāt-e-ḳhizr par un ko garāñ kahte rahe

zindagi ko ek musalsal imtihan kahte rahe

laghzish-e-pa ko hi manzil ka nishan kahte rahe

maslahat thi ya ki thi wo ishq ki majburiyan

us but-e-na-mehrban ko mehrban kahte rahe

chupke chupke kah gai jo dastan ko dastan

us nigah-e-shauq ko hum be-zaban kahte rahe

ek tabassum ek nigah aur ek qatra ashk ka

bas inhin par kahne wale dastan kahte rahe

zard patte KHushk kaliyan phul murjhae hue

ye hain aks-e-qalb-e-viran hum KHizan kahte rahe

apne hi zauq-e-nazar ne baKHshi un ko dilbari

warna kya hai jis ko hum husn-e-butan kahte rahe

gosha-e-dil mein wo mere sab simaT kar rah gaya

gham ka ek tufan jise ahl-e-jahan kahte rahe

jalwa-gar rag rag mein hai aur dida-o-dil mein nihan

hum jise KHalwat-nashin-e-la-makan kahte rahe

pyar ke lamhe jo un ki bazm mein guzre 'habib'

hum hayat-e-KHizr par un ko garan kahte rahe