zindagi ko shoabada samjha tha main

zindagī ko sho.abada samjhā thā maiñ

pattharoñ ko aa.ina samjhā thā maiñ

dhuup kī yūrish thī har ik samt se

sāya-e-dīvār se lipTā thā maiñ

aa.ine hī aa.ine the har taraf

phir bhī apne aap meñ tanhā thā maiñ

hādsoñ se khelne ke bāvajūd

aaj bhī vaisā huuñ kal jaisā thā maiñ

roz zaḳhmī hotā thā merā badan

pattharoñ ke shahr meñ rahtā thā maiñ

'umr-bhar apne ta'āqub meñ 'zafar'

apne hī saa.e se bas uljhā thā maiñ

zindagi ko shoabada samjha tha main

pattharon ko aaina samjha tha main

dhup ki yurish thi har ek samt se

saya-e-diwar se lipTa tha main

aaine hi aaine the har taraf

phir bhi apne aap mein tanha tha main

hadson se khelne ke bawajud

aaj bhi waisa hun kal jaisa tha main

roz zaKHmi hota tha mera badan

pattharon ke shahr mein rahta tha main

'umr-bhar apne ta'aqub mein 'zafar'

apne hi sae se bas uljha tha main