زندگی کیا ہے معما ہے کہ افسانہ ہے

زندگی کیا ہے معما ہے کہ افسانہ ہے

ہر طرف جلوہ بداماں رخ جانانہ ہے

میرا غم اس کے تبسم پہ گراں ہو شاید

جس کی یادوں سے یہ دل آج پری خانہ ہے

دل پہ اس شوخ کی نازک بدنی نقش ہوئی

جس کے ہر بول سے آباد یہ ویرانہ ہے

پوچھتے کاش کبھی ہم سے بتان خود سر

دل کا کیا حال ہے کیوں ہاتھ میں پیمانہ ہے

کیوں ہے احباب سے یہ عام شکایت سب کو

کس لئے ان کا ہر انداز حریفانہ ہے

ناصحا بات تری کیوں نہ اثرؔ پر ہو گراں

جتنا دیوانہ ہے وہ اتنا ہی فرزانہ ہے