zindagi kya hai tamannaon ka khaara pani

zindagī kyā hai tamannāoñ kā khārā paanī

har koī pī ke yahāñ māñge dobāra paanī

ham haiñ vo jin kī nigāhoñ ne kuchal Daalā furāt

kaun haiñ jin ke laboñ par hai ye na.ara paanī

ka.ī dariyā mirī āñkhoñ se ravāñ hone lage

us ne jab ḳhvāb meñ ik baar pukārā paanī

koī sailāb umaDtā thā ghaḌī se har din

vaqt kī shakl meñ ham ne to guzārā paanī

faisla us ne judā.ī kā sunāyā to lagā

jaise sahrā meñ koī pyaas meñ haarā paanī

is liye log sulagte hī yahāñ karbal meñ

jise miltā hai vo pī letā hai saarā paanī

tishnagī baañT ke har qaum kā rahbar ye kahe

saarī duniyā meñ to bahtā hai hamārā paanī

aaj jazbāt haiñ pyāse sar-e-qirtās 'naved'

kar rahā hai mujhe har lafz ishāra paanī

zindagi kya hai tamannaon ka khaara pani

har koi pi ke yahan mange dobara pani

hum hain wo jin ki nigahon ne kuchal Dala furaat

kaun hain jin ke labon par hai ye nara pani

kai dariya meri aankhon se rawan hone lage

us ne jab KHwab mein ek bar pukara pani

koi sailab umaDta tha ghaDi se har din

waqt ki shakl mein hum ne to guzara pani

faisla us ne judai ka sunaya to laga

jaise sahra mein koi pyas mein haara pani

is liye log sulagte hi yahan karbal mein

jise milta hai wo pi leta hai sara pani

tishnagi banT ke har qaum ka rahbar ye kahe

sari duniya mein to bahta hai hamara pani

aaj jazbaat hain pyase sar-e-qirtas 'nawed'

kar raha hai mujhe har lafz ishaara pani