زندگی کیا سوال سا ہے کچھ

زندگی کیا سوال سا ہے کچھ

ایک سانسوں کا جال سا ہے کچھ

تیرے ہونٹوں پہ ہے ہنسی کیسی

تو بھی غم سے نڈھال سا ہے کچھ

اس نے دیکھا ہے پر نہیں دیکھا

دل کو میرے ملال سا ہے کچھ

رتجگوں کا عذاب کیا کہیے

خواب گل پائمال سا ہے کچھ

ایک شاعر نے کہہ دیا تجھ کو

حسن تیرا کمال سا ہے کچھ

مجھ سے تھوڑا گریز ہی کیجے

میری جاں پر وبال سا ہے کچھ

ڈھونڈنے پر بھی آدمی نہ ملے

کیسا قحط‌ الرجال سا ہے کچھ

بے سبب یوں ہی ٹوٹ جاتا ہے

دل تو جام سفال سا ہے کچھ

وجہ دیوانگی کسے معلوم

مجھ پہ حمادؔ حال سا ہے کچھ