zindagi kya sawal sa hai kuchh

zindagī kyā savāl sā hai kuchh

ek sāñsoñ kā jaal sā hai kuchh

tere hoñToñ pe hai hañsī kaisī

tū bhī ġham se niDhāl sā hai kuchh

us ne dekhā hai par nahīñ dekhā

dil ko mere malāl sā hai kuchh

ratjagoñ kā 'azāb kyā kahiye

ḳhvāb-e-gul pā.emāl sā hai kuchh

ek shā'ir ne kah diyā tujh ko

husn terā kamāl sā hai kuchh

mujh se thoḌā gurez hī kiije

merī jaañ par vabāl sā hai kuchh

DhūñDne par bhī aadmī na mile

kaisā qaht-ur-rijāl sā hai kuchh

be-sabab yuuñ hī TuuT jaatā hai

dil to jām-e-sifāl sā hai kuchh

vaj.h-e-dīvāngī kise mā'lūm

mujh pe 'hammād' haal sā hai kuchh

zindagi kya sawal sa hai kuchh

ek sanson ka jal sa hai kuchh

tere honTon pe hai hansi kaisi

tu bhi gham se niDhaal sa hai kuchh

us ne dekha hai par nahin dekha

dil ko mere malal sa hai kuchh

ratjagon ka 'azab kya kahiye

KHwab-e-gul paemal sa hai kuchh

ek sha'ir ne kah diya tujh ko

husn tera kamal sa hai kuchh

mujh se thoDa gurez hi kije

meri jaan par wabaal sa hai kuchh

DhunDne par bhi aadmi na mile

kaisa qaht-ur-rijal sa hai kuchh

be-sabab yun hi TuT jata hai

dil to jam-e-sifal sa hai kuchh

wajh-e-diwangi kise ma'lum

mujh pe 'hammad' haal sa hai kuchh