zindagi kyon hui waqf-e-gham-o-alam na puchh

zindagī kyoñ huī vaqf-e-ġham-o-ālām na pūchh

mujh se ai dost mire ishq kā anjām na pūchh

kaun hai kis ne banā rakkhā hai dīvāna mujhe

ham-nashīñ aql se pahchān magar naam na pūchh

us kī nākām tamanna ko samajh ai sayyād

murġh-e-dil aa gayā kyoñ ḳhud hī tah-e-dām na pūchh

ho ke mahrūm tire lutf-o-karam se ai dost

kis tarah maiñ ne guzāre sahar-o-shām na pūchh

ishq-e-ḳhud.dār kī azmat ko samajh aaj 'mayank'

be-naqāb aa gayā kyoñ koī lab-e-bām na pūchh

zindagi kyon hui waqf-e-gham-o-alam na puchh

mujh se ai dost mere ishq ka anjam na puchh

kaun hai kis ne bana rakkha hai diwana mujhe

ham-nashin aql se pahchan magar nam na puchh

us ki nakaam tamanna ko samajh ai sayyaad

murgh-e-dil aa gaya kyon KHud hi tah-e-dam na puchh

ho ke mahrum tere lutf-o-karam se ai dost

kis tarah main ne guzare sahar-o-sham na puchh

ishq-e-KHuddar ki azmat ko samajh aaj 'mayank'

be-naqab aa gaya kyon koi lab-e-baam na puchh