zindagi maut ke aaghosh se paida karna

zindagī maut ke āġhosh se paidā karnā

Duub kar bahr meñ tūfān se khelā karnā

aa.e ronā bhī to hañsne kā irāda karnā

josh-e-ġham meñ na kabhī zabt se guzrā karnā

dekhnā shauq kī fitrat ko na rusvā karnā

chashm-e-mushtāq yūñhī un kā nazāra karnā

rañg lā.egā ajab jalva-gah-e-mahshar meñ

zauq-e-dīdār mirā aap kā parda karnā

mauj-e-fitrat kā har andāz hai taḳhrīb-shi.ār

ai chaman-zār bahāroñ se na rishta karnā

bahut āsān thā rabbī-arinī kah denā

koī āsāñ na thā jalvoñ kā nazāra karnā

chāk-dāmānī-e-gul bar-sar-e-merāj-e-bahār

hai junūñ-ḳhez adā hosh kā da.avā karnā

sīkhiye uqda-kushā.ī kī adā.eñ 'jumbish'

na huā kuchh bhī ye taqdīr kā shikva karnā

zindagi maut ke aaghosh se paida karna

Dub kar bahr mein tufan se khela karna

aae rona bhi to hansne ka irada karna

josh-e-gham mein na kabhi zabt se guzra karna

dekhna shauq ki fitrat ko na ruswa karna

chashm-e-mushtaq yunhi un ka nazara karna

rang laega ajab jalwa-gah-e-mahshar mein

zauq-e-didar mera aap ka parda karna

mauj-e-fitrat ka har andaz hai taKHrib-shiar

ai chaman-zar bahaaron se na rishta karna

bahut aasan tha rabbi-arini kah dena

koi aasan na tha jalwon ka nazara karna

chaak-damani-e-gul bar-sar-e-meraj-e-bahaar

hai junun-KHez ada hosh ka dawa karna

sikhiye uqda-kushai ki adaen 'jumbish'

na hua kuchh bhi ye taqdir ka shikwa karna