zindagi mein rang bhar ke mar gae

zindagī meñ rang bhar ke mar ga.e

jin ko jiinā thā vo pahle mar ga.e

marne vaalā hañste hañste mar gayā

jiine vaale rote rote mar ga.e

āsmāñ se gir ke paa.ī zindagī

aap kī nazroñ se gir ke mar ga.e

sab ko marnā hai bahar-sūrat magar

pūchhte haiñ log kaise mar ga.e

zindagī sab se baḌā in'ām hai

kahne vaale zahr khā ke mar ga.e

mar ga.e bistar pe jo zinda rahe

jī ga.e jo chalte-phirte mar ga.e

itne buzdil ho ga.e sab mere baa'd

suur kī āvāz sun ke mar ga.e

kyā karūñ ab ek hisse par ġhurūr

zindagī ke tiin hisse mar ga.e

maut ne 'irfāñ' hameñ maarā nahīñ

zindagī se laḌte laḌte mar ga.e

zindagi mein rang bhar ke mar gae

jin ko jina tha wo pahle mar gae

marne wala hanste hanste mar gaya

jine wale rote rote mar gae

aasman se gir ke pai zindagi

aap ki nazron se gir ke mar gae

sab ko marna hai bahar-surat magar

puchhte hain log kaise mar gae

zindagi sab se baDa in'am hai

kahne wale zahr kha ke mar gae

mar gae bistar pe jo zinda rahe

ji gae jo chalte-phirte mar gae

itne buzdil ho gae sab mere ba'd

sur ki aawaz sun ke mar gae

kya karun ab ek hisse par ghurur

zindagi ke tin hisse mar gae

maut ne 'irfan' hamein mara nahin

zindagi se laDte laDte mar gae