zindagi mere KHilaf aaj bhi aisi hai ki bas

zindagī mere ḳhilāf aaj bhī aisī hai ki bas

saañs letā huuñ to har saañs pe kahtī hai ki bas

kashtiyāñ thiiñ ka.ī aur ham ki musāfir tanhā

kashtiyāñ khete hue umr vo guzrī hai ki bas

ek majbūr ke ashkoñ meñ haiñ tūfāñ kitne

aur hoñToñ meñ dabī us ke vo siskī hai ki bas

saḳht dil itnā ki dil us kā pasīje na kabhī

aur zabāñ us kī zabāñ itnī bhī mīThī hai ki bas

vo thakan hai ki bas ab niiñd hī aa jaa.e mujhe

sard mausam mire atrāf vo ḳhunkī hai ki bas

vo jo ehsās kī bārish thī muallaq kuchh roz

ab vo barsī bhī to is tarah se barsī hai ki bas

zindagi mere KHilaf aaj bhi aisi hai ki bas

sans leta hun to har sans pe kahti hai ki bas

kashtiyan thin kai aur hum ki musafir tanha

kashtiyan khete hue umr wo guzri hai ki bas

ek majbur ke ashkon mein hain tufan kitne

aur honTon mein dabi us ke wo siski hai ki bas

saKHt dil itna ki dil us ka pasije na kabhi

aur zaban us ki zaban itni bhi miThi hai ki bas

wo thakan hai ki bas ab nind hi aa jae mujhe

sard mausam mere atraf wo KHunki hai ki bas

wo jo ehsas ki barish thi muallaq kuchh roz

ab wo barsi bhi to is tarah se barsi hai ki bas