زندگی رنج و شادمانی ہے

زندگی رنج و شادمانی ہے

یہ کہانی بہت پرانی ہے

درد دل پھر سہی ذرا دم لے

کوئی پل اپنی زندگانی ہے

گل جبیں ہے حسین و مہوش بھی

عالم خواب وہ جوانی ہے

رنگ دنیا بدل گیا لیکن

دل میں صورت وہی پرانی ہے

یہ شب غم یہ میری تنہائی

اس رفاقت کا کون ثانی ہے

شدت غم سے پھٹ نہ جائے دل

ہجر کی رات جاودانی ہے

ترک خلوت سے کیا ملا ہم کو

محفلوں میں بھی رائیگانی ہے

یہ محبت ہے اک قیامت سی

ہم پہ گزری تو ہم نے مانی ہے

موسم گل ہے صورت محشر

یوںہی اب زندگی بتانی ہے

میں نے نظروں سے کر دیا شکوہ

کیا عجب میری بے زبانی ہے

زندگی کا سفر تمام ہوا

آمد مرگ ناگہانی ہے

کتبہ میری لحد پہ لکھوانا

زندگی اک چراغ فانی ہے