zindagi ruThi to phir humse manai na gai

zindagī rūThī to phir ham se manā.ī na ga.ī

jab añdherā huā ik sham.a jalā.ī na ga.ī

jaise Thahre hue paanī pe makāñ ho apnā

yād-e-rafta hai ajab aa.ī to aa.ī na ga.ī

maiñ falak chhū luuñ to qadmoñ se zamīñ jaatī hai

ik na.ī duniyā ḳhalāoñ meñ basā.ī na ga.ī

jaane kaisā hai mire dast-e-hunar par ye azaab

rang yuuñ bikhre ki tasvīr banā.ī na ga.ī

ek Thokar se qabā gul kī bikheregī havā

un kī ḳhushbū bhī salīqe se churā.ī na ga.ī

be-asar aaj bhī hai zulf-e-pareshāñ kā fusūñ

yūñhī bikhrī rahī zanjīr banā.ī na ga.ī

baat ban jaatī mirī ek hī pal meñ 'salmā'

kyā kareñ baat magar ham se banā.ī na ga.ī

zindagi ruThi to phir hum se manai na gai

jab andhera hua ek shama jalai na gai

jaise Thahre hue pani pe makan ho apna

yaad-e-rafta hai ajab aai to aai na gai

main falak chhu lun to qadmon se zamin jati hai

ek nai duniya KHalaon mein basai na gai

jaane kaisa hai mere dast-e-hunar par ye azab

rang yun bikhre ki taswir banai na gai

ek Thokar se qaba gul ki bikheregi hawa

un ki KHushbu bhi saliqe se churai na gai

be-asar aaj bhi hai zulf-e-pareshan ka fusun

yunhi bikhri rahi zanjir banai na gai

baat ban jati meri ek hi pal mein 'salma'

kya karen baat magar hum se banai na gai