zindagi se umid-e-rahat kya

zindagī se umīd-e-rāhat kyā

zinda rahne kī bhī zamānat kyā

husn meñ apne be-misāl hai vo

kisī tashbīh kī zarūrat kyā

ham bhī va.ada vafā kareñ tum bhī

vājibī baat hai muravvat kyā

aish-o-ārām kī talab kaisī

ranj-o-ālām kī shikāyat kyā

har musībat kī dāstāñ kahnā

hai musībat se kam musībat kyā

dīn-e-islām se bhī pahle thī

maañ ke qadmoñ ke nīche jannat kyā

saare haq āshnā haiñ muhr-ba-lab

āj-kal jurm hai sadāqat kyā

kāñTe bo.e ga.e haiñ dekhte haiñ

gul khilā.e ḳhudā kī qudrat kyā

ḳhānqāhoñ se hukmrānī kar

taaj kyā taḳht kyā riyāsat kyā

sher kah to liye 'zafar' tū ne

hai tirī shā.erī meñ nudrat kyā

zindagi se umid-e-rahat kya

zinda rahne ki bhi zamanat kya

husn mein apne be-misal hai wo

kisi tashbih ki zarurat kya

hum bhi wada wafa karen tum bhi

wajibi baat hai murawwat kya

aish-o-aram ki talab kaisi

ranj-o-alam ki shikayat kya

har musibat ki dastan kahna

hai musibat se kam musibat kya

din-e-islam se bhi pahle thi

man ke qadmon ke niche jannat kya

sare haq aashna hain muhr-ba-lab

aaj-kal jurm hai sadaqat kya

kanTe boe gae hain dekhte hain

gul khilae KHuda ki qudrat kya

KHanqahon se hukmrani kar

taj kya taKHt kya riyasat kya

sher kah to liye 'zafar' tu ne

hai teri shaeri mein nudrat kya