زندگی تیرے لیے روشنی لاتے ہوئے لوگ

زندگی تیرے لیے روشنی لاتے ہوئے لوگ

جل بجھے آتش ادراک چراتے ہوئے لوگ

اٹھ کے دیکھا تو میں خود بھی وہاں موجود نہ تھا

لے گئے مجھ کو مرے خواب سے جاتے ہوئے لوگ

درد کی گرد میں آنکھیں بھی گنوا بیٹھے ہیں

اے غم دل تری تصویر بناتے ہوئے لوگ

ان کے بچے بھی انہی گلیوں میں رہتے ہیں تو پھر

سوچتے کیوں نہیں شہروں کو جلاتے ہوئے لوگ

اپنے کھیتوں میں اگر آگ ہی بوئی ہے تو پھر

راکھ ہو جائیں گے یہ فصل اٹھاتے ہوئے لوگ